Inisiu di Obra - 4º Pasu

Ooooppppaaaaaaaa!!!!!!!!!!!!!!!!

Oji go nu sta ku un "feeling" d'kel bon: EEEE SSSAÁAÁBBBAAADDDDUUUU!!!!!!!!!!!!!!!!!!!
Dipos di un simana komplikadu, nada komu un sábadu, ku un almosu pa relaxa.
Minis, obra dja kumesa! Forti sabi!
Má antis disu nu kre dexa um mensaji mutu impurtanti pa 3 algen: Filandru Barros (no arkitetu), Waldir Ramos (nos injinheru), César Pinto (otu injinheru):

OBRIGADU! Nhos foi nota 10.

Pa inicia un obra bu ten ki da xpidienti na:
- Enpreiteru
- Lisensa di konstruson
- I........., KUMBU (fundamental).

Na nos kazu, empreiteru e nha kumpadri Waldir Ramos, el ku si impreza EMPIL.
Dipos di tudu es tempu (3 anu), na dia 20/02/2010 es bai poi staka pa fazi vedason.
Ali fotu:
Gentis di kámara ta fazi midison pa imiti lisensa si kostruson:

Obra kumesa rialmenti na dia 25/02 (skavason):

Na kinta fera 04/03 nu bai poi primeru pedra:

Na fotu a sigir, si nhos ripára dretu tem um muedinha di 100 merés di Pápa i um sibitxi,  pa da sorti.

Kel dia me es kumesa ta preara kofraji pa inisia sapatas, i sábadu 07/03 keli ki era aspetu:

Banku i aprovason di Prujetus - 3º Pasu

MMMIIIINNNNNIIIISSSSSSSSSSSS!!!!!!!!!!!!!!!!!!

Beleza, belezinha?

Kôru di oji e sobri 3º pasu ki nu da na es kaminhu pa nu konsigi fazi nos kubiku. Li ki fi foi tudu kel duradura.

Dipos di teni txon regularizadu na nos nomi, bunitinhu, nu tinha ki bai banku pa pidi kel kumbu, ki sima nhos sabi, ka ta katadu na txon.

Nu bai banku es flanu ma nu mesteba:

-Prujetu di arkitetura i stabilidadi aprovadu na kámara

-Orsamentu di obra
-Diklarason di trabadju (vensimentu)
-NIF
-Deklarason di tudu fonti di renda
-Komprovanti ma txon e di nos (rijistu predial, skritura di kompra di txon i rijistu di skritura)
-Sirtidon matrisial

Di kes dukumentu li, mas kpomlikadu foi kes planta, dja ki nos kamara ku um tataruga tem mesmu velosidadi.

Nos arkitetu, nha primu Filandro Barros, e nos injinheru, nha kumpadri Waldir Ramos, foi kem ki fazi kes 2 prusesu pa pidi aprovason di prujetus: arikitetura i stabilidadi. 

Kandu nu ka da xpidienti na tudu kes papel nu skodji kel banku di atendenu midjor i ki tinha boka más dóxi: BCN.

Impresionanti, nu meti papel na outubru di 2008, na febreru di 2009, ki nu ben dadu risposta. Pa komplika, risposta foi negativu.

Na tudu kel tempu es da munti diskulpa: administrador ka sta, prusesu perdi, etc., etc.

Nu fliiiiiiipppppppppa!

Ma paxenxa,  banku e ka so 1 ki ten. Inda ben!

Na marsu nu meti papel na BAI, i es danu 1 tratamentu di 1º mundu. Pelu menus es ba ta flanu sempri undi ki nu pudia midjora nos pruposta. Nu ba ta intrega más dukumentu ki es pidi, ti ki na fin di Abril es danu risposta: "Crédito APROVADO". Nu tinha um "sorriso de orelha-a-orelha".

Mesmu ku pididu aprovadu, nu analiza dretu pruposta i nu odja ma afinal ka staba ton baratu si:

-Tx Jutu: 8.75% - fiksu

-Suguru di vida, suguru multi-risku a favor di BAI
-Ipoteka di imovel a favor di BAI

Nu staba tudu sertu a asina ku BAI, ma nu tinha ki likida 1 emprestimu ki Suzy tinha na BCA. Na kel ki nu bai likida, BCA siumis das i es aprezenta sis pruposta tb, i mas fixi.

-Tx Jutu: 8.0% (ku txansi di dixi)

-Suguru di insendiu a favor di BCA
-Ipoteka di imovel a favor di BCA

Entretantu, Suzy na ta fala ku um amiga di sel di Banco Interatlântico, minina bai logu ta fla ma es tinha kondison di aprizenta um midjor pruposta:

-Tx Jutu: 7.5% fiksu

-Suguru di insendiu a favor di BI

-Ipoteka di imovel a favor di BI

Nu ka mesti nen fla nhos ma nu seta, nu sina, ti ki djes danu dinheru.

Dedu dja due, txaaaauuuuuuuuuuuu.

Prusesus burokratikus (hhrrrrgggggg!!!!!!) - 2º Pasu

Pipol nhos sta bon?

Dipos di konvensi nha mai ma nu staba ku "bon intenson", txiga mumentu di kumesa da xpixienti na muda txon di nomi, pelu menus.

Primeru kuza ki nu fazi foi bai na kamara munisipal pa djobi si tudu staba dretu a nivel di papeladas. I komu nha pai e xtremamenti organizadu, foi fasil pa gentis di kamra atxa prusesu.  

La es flanu ma nu tinha ki tra 1 " Planta de Localização Actualizada".  Naturalmenti ki nu meti pididu kel ora me. Ma pa nha spantu, nu tinha ki paga 1.000$ so pa kubri dslokason di teknikus pa bai fazi verifikason di txon. Stan ma nem si poba es na um táksi pes fazi Fazenda - Palmareju - Fazenda ka ta daba nem 500 merés. N'flipa, má si ki tem ki ser, nada nu ka pudia fazeba.

Es prusesu li dura más di 1 mes, kada dia es ta ranjada 1 diskulpa: ka tem sixtéma, lus bai, diretor viaja, etc, etc, etc.

Na fin di Junho nu konsigi tem kel planta na nos mon. 

Dipos di kela, pa da inisiu na venda en si, nhas pais tinha di fazi un papel pa kamara ta kumunika "Renúncia de Pertensa", ta fla mes kre bendi txon pa sis fijdu, dja ki kamara pudia sta interesadu na kel kompra tambi. "Fala sério!", si txon e di nhas pais es divia podi  bendel pa kem kes kre sem da kamara satisfason. Ma paxenxa, la dja bai mas 1 mes.  

Pa ganha tempu, nu ba ta da um arkitetu amigu di nos fala pa ba ta poi kuzas na papel. Ku bázi na nos ideia, e kumesa da fazi primerus trasu.

Ka dura txeu tempu nos amigu arkitetu (nha primu Filandro Barros), aprizentánu kel ki foi primeru ideia pa kaza. KKKAAAAMMMMPPPIIIOOMMMMM. Faltaba nos so bába riba di kel prujétu.

A partir di la foi kompu li, stika la, fulha, puluta, ti ki bu txiga na prujetu di lisensiamentu.

Má inkuantu nu staba na stória di prujetu nu ba ta da xpidienti na kartóriu i nu konsigi asina xkritura di kompra i venda. Dipos di kela nu tivi ki bai fazi rijistu di xkritura, i sempri ta paga.

Purtantu pa kómpra di txon nhos debi mesti:

• Planta di lokalizason di txon, atualizadu (Kamara munisipal - Fazenda)
• Sertidon matrisial (Kamara Munisipal - Plato)
• "Renúncia de Pertença" (Kamara Munisipal - Plato)
• Xkritura di Kómpra i Venda (Kartóriu Txada)
• Rijistu di Xkritura (Kartóriu Sukupira)
• Rijistu Predial ((Kartóriu Sukupira)

Djam kansa ku skrebi!

Inisiu, undi tudu kuza kumesa. - 1º Pasu

Oi psual, mó ki bai?

N'ta spera na nhos sta fixi. Ami nsta li meiu dizanimadu, manhan e sugunda fera i nsta ben ten 1 simana komplikadu. Koragi fitxadu!

Nu disidi fazi es blog li pa djuda ken ki sta pensa na fazi si kaza, i mostra nhos tudu ivuluson di konstruson.

Tudu kuza kumesa na un dia ki n'bai odja un kazal amigu di nos ta fazi skavason pa konstruson di sis kaza. Keli era na Março di 2007.

Nha namorada ka staba li na KauVerdi, era 1 dumingu, i komu kel kazal dja tinha txomadu mi, n'disidi bai odja.

Xam fla nhos 1 kuza klaru, nunka npensaba ma odja katrapila ta rabolbi tera pudia ser ton imusiunanti. Nbá ta odja kel kuza, nbá ta fika kontenti, i imidiatamenti n'fika ta imajina nha kabesa na kel situason: "Pré-proprietário".

Di kel dia pa dianti, nha pensamentu era so kela, i dja ki mi ku nha namorada dja nu staba ta da xpidienti pa bai mora djuntu, era djunta util ku agradavel: nhas pais tinha 1 txon na Palmarejo (sem dia di mexi na el), mi ku nha namorada nu kria bai mora djuntu. Prontu!

Logu ki Suzy ben n'flal si e ka alinhaba pa nu kumpra nhas pais kel txon i nu fazi nos kaza, inves di bai kumpra apartamentu. E fla sim kel ora! N'da 3 pulinhu di aligria.

Dipos nu bai fala ku nha mai, i e pensa ma nu staba na gozu, e ka lebánu a sériu, e dánu so padodu. Paxenxa!

Ma kuandu nu inisiti e odja ma nu ka staba na brinkadera i nu fila nogosiu 3 mes dipos.

Entritantu, dja nu kumesaba ta bai na bankus pa djobi kual ki era midjor oferta pa imprestimu pa abitason. Kada 1 des tinha boka más sábi ki kel otu, so koristas.

Ma keli dja e na prosimu post.

Bali!

Fotu di kel txon (200 metru kuadradu)

Kel kontentor ki sta parsi na fundu e di otu konstruson.